E drejta për arsimim
Faqja “E drejta për arsimim”, që po ju paraqesim është produkt i realizimit të projektit me të
njëjtin emër zbatuar nga Qendra Europiane dhe Fondacioni Konrad Adenauer (KAS) Shqipëri.
Kjo faqe ka pasuruar platformën www.tedrejtatemia.al duke mundësuar më shumë informacion,
për studentët, të rinjtë dhe profesionistë të ndryshëm dhe punonjës të administratës publike në
nivel qëndror dhe vendor, mbi liritë dhe të drejtat themelore.
Dy videot, që po ju paraqesim janë një përmbledhje e manualit “E drejta për arsimim”, i cili
paraqet kuadrin historik, politik dhe ligjor kombëtar dhe ndërkombëtar, që rregullon të drejtën e
edukimit në vend.
Videot janë të organizuara në formën e dy leksioneve, ku e para ofron informacion mbi arsimin
parauniversitar dhe video e dytë mbi arsimin universitar.
Qendra Europiane dhe KAS, përmes kësaj faqeje synojnë të arrijnë një numër sa më të lartë
përdoruesish në radhët e profesionistëve, punonjësve të administratës publike qendrore dhe
vendore, studentëve të së drejtës dhe shkencave shoqërore, si edhe qytetarëve. Këto leksione
online iu drejtohen të gjithë atyre përdoruesve, që synojnë të marrin një informacion sa më të
përditësuar për të drejtën për arsimim në nivelin parauniversitar dhe universitar. Këto realitete
nuk mund të kuptohen të plota pa iu referuar zhvillimeve normative dhe praktikës në kuadër të
mekanizmave kombëtare dhe ndërkombëtare në mbrojtje të të drejtave dhe lirive themelore të
njeriut.
Rezultati final i këtij projekti synon të përmirësojë njohuritë dhe kapacitetet e një serie
përdoruesish në lidhje me një të drejtë e cila është thelbësore për fuqizimin e individit me qëllim
kërkimin dhe realizimin e të drejtave të tjera të njeriut.
Qendra Europiane
Qendra Europiane është një organizatë jo-fitimprurëse e pavarur, e themeluar në qershor 1999, e
cila e shtrin aktivitetin e saj në të gjithë Shqipërinë. Misioni i Qendrës është të kontribuojë në
konsolidimin e shtetit të së drejtës, me një fokus të veçantë në standardet e të drejtave të njeriut,
në kuadër të integrimit të Shqipërisë në Bashkimin Evropian. Qendra zhvillon aktivitetin e saj në
4 shtylla kryesore: Të drejtat e njeriut, Shteti i së drejtës, Integrimi Europian si dhe Demokracia e
qeverisja e mirë.
Qendra kujdeset që në implementimin e projekteve të saj të përfshijë grupe të marxhinalizuara si:
fëmijë, gra, persona me aftësi të kufizuara, komunitetin Rom dhe Egjiptian dhe persona me
pamundësi të tjera, si dhe të përfshijë gjeografikisht të gjithë qytetet e njësitë administrative të
Shqipërisë.
FONDACIONI KONRAD ADENAUER
Liria, drejtësia dhe solidariteti janë principet që orientojnë punën e Fondacionit-Konrad-
Adenauer (KAS). KAS është një fondacion politik, i cili i qëndron pranë Unionit Kristian-
Demokrat të Gjermanisë. Konrad Adenauer (1876-1967), si bashkëthemelues i Unionit
Kristian-Demokrat dhe si kancelar i parë i Republikës Federale Gjermane, bashkoi në një
traditat kristiane, sociale, konservative me ato liberale. Emri i tij është simbol per rindërtimin
demokratik të Gjermanisë, për pozicionimin e politikave të saj të jashtme në një bashkësi
vlerash transatlantike, për vizionin e një Europe të bashkuar dhe për orientimin ndaj
ekonomisë sociale të tregut. Trashëgimia e tij shpirtërore është për ne, detyrë dhe zotim
njëkohësisht.
Fondacioni „Konrad Adenauer“-Zyra për Shqipërinë, vë në jetë projekte me parlamentarë,
akademikë, njerëz dhe aktorë të shtetit të së drejtës, për të arritur kësisoj përmbushjen e
kushteve të anëtarësimit të Shqipërisë në BE.